કલ્યાણિકા/ઉરની ભરતી
| ← મનબંધન | કલ્યાણિકા ઉરની ભરતી અરદેશર ખબરદાર |
માયાની લગની → |
ઉરની ભરતી
• રાગ આસાવરી — તાલ ત્રિતાલ •
કેમ રમાડું મનમાં, હરિ ! તને કેમ રમાડું મનમાં ?
ફાંસ પડી જીવનમાં, હરિ ! તને કેમ રમાડું મનમાં ? -(ધ્રુવ)
માયા માયા રમી રહી છે
તનમનમાં ખૂબ તાને;
એક તસુ પણ દિસે ન ખાલી,
રમવા ઘડી તુજ ગાને !
હરિ ! તને કેમ રમાડું મનમાં ? ૧
પ્રેમપાત્ર થઇને જે પેઠી,
તે જીવન લઈ બેઠી !
મનમિનારે ચિત્ર ચિતારે,
કેમ ઉતારું હેઠી ?
હરિ ! તને કેમ રમાડું મનમાં ? ૨
મનમાં માયા, માયામાં મન :
વસમી એજ ઉપાધિ;
શોધી રહું સુખના દેશો, પણ
દુખખડકે જઉં લાધી !
હરિ ! તને કેમ રમાડું મનમાં ? ૩
નામ રૂપની વ્યાખ્યા કરવા
તું આવ્યો હું રૂપે :
નામ રૂપ સૌ જ ઈ બંધાયાં
મનને માયાકૂપે !
હરિ ! તને કેમ રમાડું મનમાં ? ૪
ઉરની ભરતી ભવ્ય ચઢાવું,
તાન ભરું તુજ તનમાં;
માયા હઠતી જાય અદ્દલ ત્યાં
હરિ હરિ રમી રહે મનમાં !
હરિ ! તને કેમ રમાડું મનમાં ? ૫