કલ્યાણિકા/નવપ્રકાશ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← કલ્યાણ કલ્યાણિકા
નવપ્રકાશ
અરદેશર ખબરદાર
અમૃતપાત્ર →
* રાગ માઢ - તાલ હીંચ[૧] *



જરી આવી આવીને કંઈ જાય રે :
એ તો હશે ક્યાંના એવા ઝબકાર ?
મારું અંતર અંજાય ને મુંઝાય રે :
એ તો હશે ક્યાંના એવા ઝબકાર ?- ( ધ્રુવ )

ઊંડા આકાશ રહે દિશદિશ ઘેરાઈ, ને
ઊતરે ઊંડા અંધાર ;
ક્યાંથી ને કોણ એનાં પટને વીંધે આ ?
ઝબકીને જોઉં પળવાર રે !
એ તો હશે ક્યાંના એવા ઝબકાર ? - જરી૦ ૧

રાતે હું સૂતો ને દિનભર યે સૂતો,
ઊઘડ્યાં ન સાચાં દિદાર :
ઘેરાં ઘસાઈ ઘન વેદન પોકારે,
ઊડે ત્યાં વીજચમકાર રે !
એ તો હશે ક્યાંના એવા ઝબકાર ? - જરી૦ ૨

જૂઠા સંસારની વેઠી હલામણ ને
જૂઠા વહ્યા તન ભાર :
આજે પડળ શું એ ઊતર્યાં આંખનાં ?
પલક્યું શું કાંઈ પેલી પાર રે ?
એ તો હશે ક્યાંના એવા ઝબકાર ? - જરી૦ ૩

એ રે ઝબકારની પાંખો પકડવા
લાવો કો સ્નેહનો તાર !
પલકી જરાક ફરી ઊડી ન જાય એવો
બાંધું એ અંતરને બાર રે !
જશે પછી ક્યાં એ ઊડી ઝબકાર ? - જરી૦ ૪

-૦-

નોંધ

  1. " મન માયાના કરનારા રે " - એ ગીતના લયમાં.

ટિપ્પણ

ટિપ્પણ:નવપ્રકાશ