જર્જરિત દેહને

વિકિસ્રોતમાંથી
Jump to navigation Jump to search
જર્જરિત દેહને
બ. ક. ઠાકોર
કાવ્ય પ્રકાર-સૉનેટ, છંદ-પૃથ્વી.


સખા કહું? કહું તુરંગમ? તું છેક હારી ગયો?
ત્રુંટું ત્રુટું થઇ રહ્યો વિકલ સંધિ ને સ્નાયુમાં ?
ન સ્થૈર્ય, નવ હોશ લેશ, શ્વસને ન વા વર્ત્તને
ખમાય લગિરે અનીમ. અહ શી દશા તાહરી !

તથાપિ સફરે પ્રલંબ મુજ સાથિ સંગી અરે,
હ્જીય મુજને જવૂં છ ડગ સ્વલ્પ, તું ચાલ જો:
હજી છ મુજને કંઇક કરવૂં અધૂરું પુરૂં,
ઉકેલિ લઉં તે, – પછી ઉભય તું અને હું છુટી

વિરામમધુ પ્રાશવા, અક્રિયતોદધિ સેલવા,
જુની સ્મૃતિ તણાં અનંત પતળાં રુચિર વાદળાં,
તરંત ઉભરૈ રહંત, રહિ હૈ જ વાગોળવા !
સબૂર જરિ, ના ચહું કશુંય જે તને શક્ય ના,

કદી ન તગડીશ, લે વચન! સાથિસંગી અહો,
જરા ઉચલ ડોક; દૂર નથી જો વિસામો હવે.

શબ્દાર્થ[ફેરફાર કરો]

  • તુરંગમ – ઘોડો
  • સંધિ – સાંધા

  • પ્રલંબ – લાંબી
  • અક્રિયતોદધિ – નિષ્ક્રીયતાનો સાગર

  • રુચિર – સુંદર