આ પાનાનું પ્રુફરીડિંગ થઈ ગયું છે
મારી બાને ખબર ન પડે, હો !
૯
રમુ ચાર વર્ષની થઈ છે, કમુ બે વરસની છે, કમુ પાસેથી કંઈ લઈ લેવું હોય તો રમુ લઈ લે છે ને કહે છે: "કાગા લઈ ગ્યા, કાગા લઈ ગયા !”
ધીરે ધીરે કમુએ 'કાગા લઈ ગ્યા !'નો અર્થ શોધી કાઢ્યો લાગે છે.
ગઈ કાલે બટેટાં પડ્યાં હતાં. કમુએ બેટેટાંને ફરાકની ખોઈમાં ભર્યા; કોઈ ન દેખે એવી રીતે ઢાંક્યાં. પછી બધાની સામે જોઈને કહેઃ "કાગા લઈ ગ્યા, કાગા લઈ ગ્યા !”
લાગે છે રમુ એની બાથી છેતરાઈ નહિ હોય; કમુ રમુથી છેતરાઈ નથી. 'કાગા લઈ ગ્યા !' એટલે સંતાડી દીધું.
સંતાડી દેવાનો આ પ્રયોગ ગમ્મત ભરેલો છે.
મારી બાને ખબર ન પડે, હો !
“એલા કાનજી, શું ખાય છે ?”
“એ તો મમરા ખાઉ છું.”
“મારો ભાગ આપને ?”
“મારી બાએ ના પાડી છે.”
“શું કામ ના પાડી છે ?”
“કાલે તારી બાએ મારી બાને મેળવણ ન આપ્યું એટલે.”
“પણ હું તો તને ભાગ આપું છું ને ? હું ક્યાં ના પાડું છું ?”