પૃષ્ઠ:Aa te shi mathafod - Gijubhai Badheka.pdf/૯૩

વિકિસ્રોતમાંથી
આ પાનાનું પ્રુફરીડિંગ થઈ ગયું છે
ટીકા અને કદર ૮૯


“જોને, ઘરમાં સૌનાં કપડાં રખડે છે. આતે ઘર છે કે ધોબીની દુકાન છે ?”

“એ છોકરા ! અત્યારે આરડવા ક્યાં લાગ્યો ? આ તો બપોર છે. તેં તો માથું પકાવ્યું !”

“જોને, માથું ઓળતાં આવડ્યું છે ?”

“જોને, કોટ કાંઈ મેલો પહેર્યો છે !”

“જોને, હાથ કાંઈ ધોયા છે ! આ ધુળ તો ચોંટી છે.”

“જોને, કાંઈ ખાતાં ખાતાં એઠું પડ્યું છે !”

“આ ચોપડી તો ઊંધી ગોઠવી છે ! જો ચોપડીઓ ગોઠવી !” “જોને, ચાંદલો કરતાં આવડ્યો છે ? ક્યાં જાતો ઊંચે કર્યો છે !”

“વાળ્યું ખરું, પણ પગે તો ધૂળ ચોંટે છે !”

“ચોખા બધા દઝાડી દીધા. ધ્યાન રાખે છે ?”


“બચુ, આ વાળ તો કોઈએ સરસ કાપ્યા છે ! હવે એ ઓળવાથી વધારે સરસ લાગે.”

“બેન, જો પણે શાક છે તે સુધારી નાખને ? આ કામ જરા પછી લેજે.”

“ચાલ તો, આ કપડાં ઉપાડી લઈએ. બધા ધૂળે ભરાય છે; જરા મૂકી દઈએ.”

“અરે ભાઈ, આમ આવ. જો સંગીત સાંજે કે સવારે શોભે. અત્યારે જરાં વાંચીએ લખીએ.”