બાદશાહે આંગળી બતાવી પૂછ્યું “આ કઈ કોટડીની કુંચીયો છે?”
દાસીએ હાથ જોડીને અરઝ કરી “હુઝૂર ! જે કોટડીમાં જહાંપનાહ (તમે) કેદ હતા એજ કોટડીની આ ચાવીયો છે !! ”
આ ઉત્તર સાંભળી બાદશાહ લાજવાબ બની ગયો અને દાસીને ઘણું જ ઈનામ આપ્યું.
વાર્તા ૧૦૭.
વાત તો હું કરી લઇશ.
એક પ્રસંગે બીરબલ એક અગત્યના કામ માટે બાદશાહના ખાનગી ઓરડામાં દાખલ થયો. બાદશાહે કહ્યું “ બીરબલ ! અત્યારે તમે કેમ આવ્યા ?”
બીરબલ બોલ્યો “હુઝૂર ! એક અગત્યના કામ બાબત આપને થોડુંક પૂછવાનું છે.” બાદશાહે કહ્યું “અત્યારે મ્હને વાત કરવાને અવકાશ નથી, માટે બીજા દિવસ પર મુલ્તવી રાખો. ” બીરબલે વિનોદપૂર્વક ઉત્તર આપ્યો “જહાંપનાહ ! આપ ગભરાશો નહીં, વાત તો હું કરી લઈશ.”
વાર્તા ૧૦૮.
તમારા કેટલા પુત્ર છે ?
એક દિવસે બાદશાહે બીરબલને સવાલ કર્યો કે “ બીરબલ! તારાં લગ્ન ક્યારે થયાં ?” બીરબલે કહ્યું “હુઝૂર! પાંચ વર્ષ થયાં હશે.”
બાદશાહે પુછ્યું “તારા પુત્ર કેટલા છે?”
