આ પાનું પ્રમાણિત થઈ ગયું છે.
આદર્શ :૨૯
બંને પત્નીઓનાં મુખ ઉપર વિજય હાસ્ય છવાયું.
રાત્રે પ્રિન્સિપાલ સાહેબનું આખું કુટુંબ સિનેમા જોવા ગયું. પરદેશી ચિત્રમાં એક વિદ્યાર્થીએ દેશને માટે આપેલા ભોગનું દૃશ્ય હતું. કેળવાયલાં કુટુંબોએ તેને તાળી પાડી વધાવ્યું.
બહાર નીકળતા એક મોટા આયનામાં પ્રિન્સિપાલે પોતાનું મુખ જોયું. તેમના મુખ ઉપરની પ્રસન્નતા એટલી બધી મોહક હતી કે તેમને પોતાને જ વિચાર આવ્યો :
'છબી પડાવી હોય તો?'
યુરોપના મુત્સદ્દીને શરમાવે એવું ચકોર મુખ એમનું હતું !
ગૌતમ એ વખતે સાધારણ સ્થિતિના પિતા સાથે રેલ્વેના ત્રીજા વગમાં મુસાફરી કરતો હતો.