આ પાનું પ્રમાણિત થઈ ગયું છે.
[૮]
:એકતારો:
યુગ યુગના કેડા પર કદમો ભરતી,
સર્જન સંહાર બેની જોડી આવે;
પૃથ્વીના હૈયા પર પગલાં ધરતી,
રચના ને નાશ બેની જોડી આવે. ૧.
સંહારે સર્જનને દીધા ડારા :
“પાછી વળ, પાછી વળ, પામર બંધુ !
પાછાં લૈ જા પા પા પગલાં તારાં,
ફાળે ફાળે હું બ્રહ્માંડો છુંદું.” ૨.
સર્જનનાં નયણાંએ પાંપણ ઢાળી,
ગાલો પર લજ્જાનાં ડોલર ઊઠ્યાં,
મલકાવી મોઢું એ બોલી બાળી,
“જાઓ વીર ! મૈત્રીથી મ્હાલો છુટ્ટા.” ૩.
સંહારે ઈશ્વરના વાઘા પહેરી,
અબજોની માનવતા બાળી ઝાળી;
સર્જનની ધારા ત્યાં શતધા રેલી,
રોપી રહી મુક્તિની કેસર–ક્યારી. ૪.
