આ પાનું પ્રમાણિત થઈ ગયું છે.
[ ૧૦૦ ]
ડૂબેલા ઈશ્કને દરિયે
જનમના જોગીડા છઈએ,
ફકીરી હાલમાં ફરીએ:
ન પર્વા કાલની કરીએ !:
ખુદા દિલબર સનમ કરીએ:
જનમના જોગીડા છઈએ.
ભલે રડીએ, ભલે હસીએઃ
ભલે પડીએ, ભલે ચડીએઃ
મગર ના ! ના! નહીં ડરીએઃ
જનમના જોગીડા છઈએ.
નહી ! નહીં નોકરી કરીએ :
અસલ મસ્તાન દિલ છઈએ.
જુલમ જૂઠા નહીં સહીએ:
જનમના જોગીડા છઈએ.
સનમના પ્રેમસાગરની,
અમે ગેબી લહર છઈએ:
સનમના મસ્ત કાયમના,
જનમના જોગીડા છઈએ.
ફકીરી બાદશાહ છઈએઃ
ફકીરી બાદશાહ છઈએ.
અમે તો બાદશાહ છઈએ:
ફકીરી બાદશાહ છઈએ.