પૃષ્ઠ:Jail-Officeni.pdf/૭૨

વિકિસ્રોતમાંથી
આ પાનું પ્રમાણિત થઈ ગયું છે.

– ને સાચેસાચ એ નવો ગુનો કરીને આડીબેડી મેળવ્યે જ રહે છે. પણ એ શું કમ શોખીન છે ! સારામાં સારા વિલાયતી નળિયાનાં ઠીકરાં વીણીને એનો છૂંદો કરી પછી નં. 4040 પોતાના આરામના સમયમાં બેડીને ઘસ્યા જ કરે છે. પણ ઠીકરાંથી કાઢેલો ચળકાટ એને સંતોષી શકતો નથી. માથું ધુણાવીને એ બબડે છે: “નહિ નહિ, આ નહિ ચાલે. રૂપાની ચમક ના આવે ત્યાં સુધી જિગર ન માને.”

દીપડા જેવી પોતાની આંખે એ ચારેય તરફ નજર કરે છે. પછી એને ઈલમ યાદ આવે છે. લુહારકામના કારખાનામાં જઈને એ કાનસની ચોરી કરે છે.

કાનસની ચોરી ! ભયંકર ગુનો ! જેલના સળિયા કાપીને નાસી જવાની કોશિશ ! જેલના અનેક કેદીઓ એક કાનસની મદદથી પલાયન કરી ગયા છે. નં. 4040 ! તું પકડાઈશ તો તને ભારી આકરી નશ્યત કરશે, હો !

“છો કરે ! પણ હું નં. 4040 ! હું કાટેલી, કાળી, કદરૂપી બેડી તો નહિ પહેરું. કરવી તો બાદશાહી કરવી, યાર ! નહિ તો જિંદગી શા કામની ! જીવવું તો મરદની રીતે જીવવું !”

એમ એ કાનસથી ઘસીને બેડીમાંથી ઝળાંઝળાં તેજ ચળકાવે છે. પછી જ્યારે એ બહાર નીકળે છે ત્યારે રાજરાજેન્દ્રનેય ઈર્ષ્યા કરાવે તેવું ગૌરવ એ છાંટતો જાય છે. આવ આવ, ભાઈ નં. 4040 ! આજ તારી મુલાકાત આવે તો હું કેટલી ભાગ્યશાળી બનું ! તને તો હું નીરખી નીરખીને જોવા ચાહું છું.

ભાઈ નં. 4040 ! જેલર સા’બ દરવાજે જ ઊભા છે, છતાં એની સફેદ ગાદીવાળી ખુરશી ઉપર બેસીને તું કેવી હાકેમી ભોગવી શકે છે ! સહુના શ્વાસ ઊંચા ચડી જાય છે, બધાને ફફડાટ લાગે છે કે જેલર સા’બ હમણાં જ આ તરફ નજર કરશે અને નં. 4040ને શું-નું શું કરી નાખશે !

“શું કરી નાખશે ?” નં. 4040નો નીડર આત્મા પૂછે છે સહુને કે “કરી કરીને શું કરી નાખશે ? એના ખિસ્સામાં દસ-બાર સજાઓ પડી છે તે આપશે ને ? તેની તો અજમાવેશ થઈ ગઈ છે, યારો ! ન ગભરાઓ.”


62
જેલ ઓફિસની બારી