પૃષ્ઠ:Kalapino Kekarav.pdf/૨૪૭

'નહિ નહીં મળે મા ગઈ ફરી !
'જગતમાં નકી મા બને નહીં !

'દિવસ બે સહુ લાડ પૂરશે !
'દિવસ બે દયા સર્વ રાખશે !
'પણ ન છાતીએ કોઈની તમે !
'રઝળતાં હવે એકલાં રહો !

'બહુ કરી શકી વ્હાલ હું નથી !
'કદિ રડાવતી હું ઘણું હતી !
'તમ દિલો ક્ષમા આપશે મને !
'પણ ન માતને ચેન કૈં પડે !

'અરર ! બાપલાં બાલુડાં ! અરે !
'તમ પરે હવે ઢાલ ના રહી !
'રડતી દૂર જે બે ઘડી થતાં !
'અરર ! તે હવે દૂર સર્વદા !

'ત્યજી દ‌ઉં નકી સ્વર્ગ, બાપલાં !
'ઘડીક તેથી જો હર્ષમાં રહો !
'સહુ હવે સદા બોલશે રડી,
'જનની છે જરા ગામ કો ગઈ !'

'અરર ! એ તમે કેમ માનશો ?
'રડી રડી મુખો ના સુકાવજો !
'નવ જવું ગમે ગામ એ મને !
'પણ ન ઠેલી એ સાદ કો શકે !

અરર ! ના શકું શાન્તિમાં મરી !
'હૃદય ઝીલતું ભાર આ નથી !
'પ્રભુ તણી કૃપા પામજો સદા !
'સહુ અનાથનો એ જ નાથ છે !

'જરીક મ્હોં હવે જોઈ તો લ‌ઉં !
'ક્યમ ભલા નથી આવતાં અહીં !
'કદિ ન ખેલમાં ખોટી હું કરૂં
'તમ કને નહીં કોઈ દી રડું !

કલાપીનો કેકારવ/૩૦૦