'જ્યાં અન્ધતાના પડદા તૂટ્યા છે,
'તે કાલ સ્થાનો પ્રિય પ્રેમીને - સખે!
'આ કૂચ મોકૂફ કરીશ આજે,
'આ સ્થાનમાં કાંઈ ઠરીશ આજે;
'હૈયે મૃદુ કાંઈ ઘડીશ આજે,
'પ્રયાણ કાલે કરશું સુખે - સખે!'
ખભો એ મિત્રનો ટેકી, ઉભો શાન્ત હમીરજી;
સખાની અશ્રુથી ભીની ઢળે છે કંઈ આંખડી.
સુગન્ધી વાયુની લ્હેરી થંડી મન્દ વહી જતી,
ચોપાસે માનવીનો કો આવે ના શ્રવણે ધ્વનિ.
સર્ગ - ૨
નિમન્ત્રણ
જે વૃત્તિ - ચિનગી સદા પ્રણયમાં દાવા બની મ્હાલતી,
જેની જ્યોતિ અનેક રંગ પલટી લાલી પ્રસારી રહી;
જેની ઉજ્જવલતા યથાર્થ સઘળે સંબંધ જોડી વહે,
તે વૃત્તિ - ચિનગી તણી મધુરતા આ બીન ગાતું રહે!
***
ચાલતા સૈન્યને આજે ત્યાંનું ત્યાં ફરી રોકાવા,
દુઃખી કૈં મિત્ર યોધ્ધાનો ગયેલો છે પડાવમાં.
અકારણે જે ઉરને ગમેલી,
હૈયા તણા તખ્ત પરે રહેલી,
તે મૂર્તિમાં મગ્ન હમીર થાતો,
બને ફરી સુન્દરનો ચિતારો.
તે નેત્રને તે મુખની સુરેષા,
ભાવો સહુ જે હૃદયે ઘડેલા,
પ્રત્યેક તે છાપ ઊઠી રહી ઉરે,
પ્રત્યેકમાં સાધી રહ્યો સમાધિ.
વૃક્ષો, લતા, પુષ્પ,સમીર,વારિ,
વિશાલ ભૂરૂં નભ જે ઝુમી રહ્યું,