પૃષ્ઠ:Kalapino Kekarav.pdf/૯૦

વિકિસ્રોતમાંથી
આ પાનાનું પ્રુફરીડિંગ થઈ ગયું છે

ફરી નેત્ર ગયું!
ફરી દિલ ગયું!

તુજ કાગળમાં મુજ નામ ફર્યું!
હજુ 'પ્રેમ ફર્યો ન' કહે તું, સખે!
હજુ સાબિત શું કરવું'તું? સખે!
તુજ પ્રેમની ઓટ થઈ જ, સખે!

૮-૩-'૯૬

ક્ષમા

દુઃખ તુંથી ન થાય મને કદિ એ?
કદિ દે દુઃખ તો સુખી તે જ દુઃખે!
પછી માફ કરૂં તુજને શું? સખે!
વિણ બીજ તરુ ઉપજે કદિ એ?

જગમાં કદિ માફી મળે ન, સખે!
મળે માફી ભલે સહુ લોક કહે!
દિલ દાગ પડ્યો 'ન પડ્યો' ન બને
પછી માફ કરે જગ ક્યાં થી? સખે!

વિસરી ન જવાય બનેલી બિના!
પછી 'માફ થયું' ક્યમ થાય? સખે?

તૂટી દોર ગયો!
પછી એક થયો!


કહિં એમ બનેલ,સખે!કદિ છે?

પડી ગાંઠ ભલે!
પડી સાંધ ભલે!


પણ દોર તૂટેલ તૂટેલ રહે!
બનશે નહિ તે બનશે ન, સખે!
પણ માગ ક્ષમા મુજ ના કદિ તું!
નથી કાંઇ તૂટ્યું પછી સાંધીશ શું!

વિણ દર્દ દવા કરવી ન ઘટે,
વિણ દર્દ દવા કડવું વિષ છે.

કલાપીનો કેકારવ/૧૪૩