આ પાનાનું પ્રુફરીડિંગ થઈ ગયું છે
આનંદ
૧૨૭
સતત વિશ્વવસંત
• રાગ કાફી — હોરી •
વિલસે વિશ્વલીલા વસંતે,
નાથ નાચે અનંતે ! - (ધ્રુવ)
આનંદ આનંદ ઊછળી રહ્યો છે તારક સૂરજ ચંદે,
નંદનવન ત્રિભુવન જનજીવન એ નવયૌવન સ્પંદે ;
તગે તનમન તંતતંતે ! —
નાથ નાચે અનંતે ! ૧
ગાલ ગુલાલથી લાલ કરી નાચે સંધ્યા ઉષા આભસ્કંધે ;
વન ઉપવનમાં પવન વાઈ ગાતો, મુદિત સુમનની સુગંધે ;
ચઢે રંગ એ વિશ્વચંતે ! —
નાથ નાચે અનંતે ! ૨
તાન તનાવટ, ગાન જમાવટ, તાલ સુરાવટ સંધે ;
જળજળ થળથળ ભૂરકી પડી એ પ્રબળ પ્રબોધન બંધે ;
ખલક ખીલી રહી ખૂબ ખંતે ! —
નાથ નાચે અનંતે ! ૩
