આ પાનાનું પ્રુફરીડિંગ થઈ ગયું છે
૨૨
કલ્યાણિકા
પ્રભુની સ્નેહઠગાઈ
( ધોળ )
જા રે પ્રભુ ! આ તારું જગત નથી રે જોઈતું !
એને આગળ કરી તું ગુપ્ત રહે શું દૂર ?
તારી લાખ લીલામાં સર્વ રહ્યા લોભાઈને,
પણ મુજને તો જોઇએ એક જ ઉરનૂર :
જા રે પ્રભુ ! આ તારું જગત નથી રે જોઈતું ! ૧
તારો સૂરજ આવી બાંધે તેજકિરણ વડે,
તુજ તારા અમને તમજાળે ઘસડી જાય;
હું તો તેજ તિમિર વચ્ચે મુજ આંખો ઠેરવું,
તારી છાય જરા પકડું કે તું લોપાય !
જા રે પ્રભુ ! આ તારું જગત નથી રે જોઈતું ! ૨
તુજ સંદેશા જેવા ગગને ઘૂમી રહે,
તારાં ઘોર નગારાં વાગી રહે આકાશ;
અમૃતબિંદુ પડે ટપકી તુજ પ્રેમાળ પાત્રથી,
ભીંજવે ભૂમિ, પરંતુ ભીંજાય ન મારી આશ :
જા રે પ્રભુ ! આ તારું જગત નથી રે જોઈતું ! ૩
