આ પાનાનું પ્રુફરીડિંગ થઈ ગયું છે
૫૦
કલ્યાણિકા
આવતી કાલનાં સ્વપ્નાં
• રાગ ભૈરવી — તાલ દાદરો •
હું તો જીવું કરી કાલ કાલ રે,
નાથ ! હું તો જીવું કરી કાલ કાલ :
મારાં સ્વપ્નો એ જ એક તાલ રે,
નાથ ! હું તો જીવું કરી કાલ કાલ ! - (ધ્રુવ)
આજે અંધારાંના ઊભા મિનારા,
ઊભા ઘેરી દિક્પાળ :
કાલે દિગંતપટ વીંધીને વેરશે
જ્યોતિના સભર જુવાળ રે :
નાથ ! હું તો જીવું કરી કાલ કાલ ! ૧
આજે છે જગતની જડતાનાં ઝાડવાં,
અણમહોરી ડોલે એની ડાળ :
કાલે વસંતના વાયુ અહીં વાશે ને
ફૂટશે કંઈ ચેતનના ફાલ રેઃ
નાથ ! હું તો જીવું કરી કાલ કાલ ! ૨