પૃષ્ઠ:Kalyanika - Gu - By Ardeshar Khabardar.pdf/૮૩

સાધન

૭૩

 

---

વહે સરિતાનાં નીર, પીએ ફકીર કે અમીર;
પશુ પ્રાણી પંખી જાય, સર્વની તૃષા છિપાય;
ભલે બિંદુ રહે ન એક, થાય કાય શુષ્ક છેક:
⁠આપું આપું રે આપું આપું એવો સતત જપે જાપ !
⁠સંત જીવે રે સંત જીવે જીવન જગત કાજ આપ. ૪

કાપે ઘસે બાળી તોય, નહીં નિજ સુવાસ ખોય,
અણુઅણુએ રહી સુગંધ , તે ન કરી શકાય બંધ;
એવી ચંદન કેરી રીત, એવી નેકી છે અજીત :
⁠હૈયે હૈયે રે હૈયે હૈયે એની રહે અમર છાપ:
⁠સંત જીવે રે સંત જીવે જીવન જગત કાજ આપ. ૫

હોય પહાડ જેવાં શીર, તોય નીચનું ખમીર;
હોય સિંધુશા વિશાળ, તોય હ્રદયના કંગાલ ;
હોય વિદ્યા કેરી ખાણ, તોય અંતરે મશાણ:
⁠જીવે સ્વાર્થે રે જીવે સ્વાર્થે એવા સૃષ્ટિ કેરા શાપ !
⁠સંત જીવે રે સંત જીવે જીવન જગત કાજ આપ. ૬

જેણે સાધ્યો પરમાર્થ, તેનું જીવ્યું થયું સાર્થ ;
જીવી જાણ્યું અન્ય કાજ, તેને મળ્યું આત્મરાજ્ય;
આપી જાને જે હસંત, તે જ અદ્દલ સત્ય સંત :
⁠શ્વાસે શ્વાસે રે શ્વાસે શ્વાસે જીવનદાનનો પ્રલાપ !
⁠સંત જીવે રે સંત જીવે જીવન જગત કાજ આપ. ૭