પૃષ્ઠ:Kankavati.pdf/૧૩૮

વિકિસ્રોતમાંથી
આ પાનાનું પ્રુફરીડિંગ થઈ ગયું છે

રાણીએ તો પૂરવ ભવની વાત કહી છે. રાજાની તો ભરાંત ભાંગી છે. ઘણકીને ફળ્યાં એવાં સહુને ફળજો !


ગાય વ્રત

શ્રાવણ માસમાં કરે.
એક ટાણું કરે
રોજ આવતી ગા પૂજીને ખાય.
લીલું ધાન ન ખાય.
લીલી ચીજ ન ખાય.
લીલા રંગનું લૂગડું ન પહેરે.
રોજ સવારે ગાયની વાર્તા કરે.
ભૂખ્યું હોય એને કરે
ગાયના કાનમાં કરે.


વાર્તા[૧]

એક બ્રાહ્મણની છોકરી હતી.
ગાયમાનાં વ્રત કરતી'તી.
કરતી કરતી મરી ગઈ.
કોળીને પેટ પડી.
કોળી કોળી કહેવા લાગ્યો:
રાંકને પેટ રતન શાં ?
કૂલડીમાં પાણી આલો !
કોડિયામાં ધાણી આલો !
ધાણીધાણી ખાય છે.
પાણીપાણી પીએ છે.

🌿
  1. આ વાર્તા ગુજરાતમાં ઉમરેઠ તરફ કહેવાય છે.