આ પાનું પ્રમાણિત થઈ ગયું છે.
અમુલખ અલખ ઘડી એ ઊગી, અહો !
હુલ્લાસી કાળઅજિતા રે લોલ;
ગાવો-ગાવો, સખી મંડળ ! મળી સહુ
આયુષ્યપર્વની ગીતા રે લોલ.
પ્રારબ્ધવર્ણા પુષ્પો ખીલ્યાં,
કાંઈ પાંખડીએ પ્રેરણા પીતાં રે લોલ;
હૈયાની છાબો ભરી રંગફૂલડે
જગને વધાવો, હો વનિતા ! રે લોલ.
વિશ્વવસન્ત કેરી છાલકો છાંટતી
ઊછળે રસની સરિતા રે લોલ;
આભઆભ વીંધતી પ્રચંડ બ્રહ્મવીણા
વાગે છે વિશ્વઅતીતા રે લોલ.
ત્રિલોકપાટે ઊભા જો ! આમન્ત્રે
વિશ્વવસન્તના સવિતા રે લોલ;
જાતાં જાતાં યે હો ! ગાજો, રસિકવર !
બ્રહ્માંડજયિની કવિતા રે લોલ.
