પૃષ્ઠ:Nhana Nhana Ras Part-3.pdf/૨૮

વિકિસ્રોતમાંથી
આ પાનું પ્રમાણિત થઈ ગયું છે.
સોહાગિયાં


ઉરનાં બારણાં ઉઘાડો, સોહાગિયાં !
ભાગ્યનાં બારણાં ઊઘડશે, સોહાગિયાં !

કાળની કુંજ સમી ઝાડીઓ રે
ઝૂકી જમનાને ઘાટ,
ઝૂકી જમનાને ઘાટ,

પ્રેમના પંખી ડાળે માણતાં,
જગે ઢોળે કિલકિલાટ,
જગે ઢોળે કિલકિલાટ,

સુણજો, ઓ સ્નેહનાં સોહાગિયાં !
જાગો, ઓ સ્નેહનાં સોહાગિયાં !

આભના આગળા ઉઘાડો, સોહાગિયાં !
ભાગ્યનાં બારણાં ઊઘડશે, સોહાગિયાં !