આ પાનાનું પ્રુફરીડિંગ થઈ ગયું છે
૯
અશ્રુસંયમ.
(ગરબી.*[૧])
આંસુડાં શિદ ઢોળું સૂકા રાનમાં ?
રેડું ઉરમાં ઊંડી એ અમીરેલને;
ભીંજે ત્ય્હાં કંઇ વેલી અલૌકિક ભાવની,
ને કુસુમિત થઈ દિવ્ય રૂપની એ બને.
આંસુંડા શિદ ઢોળું૦ ૧
કે સૂકા રણમાંહિ કહિં કહિં નીરખું
સ્નેહી-ઉરકુંજો, ત્ય્હાં લહું વિશ્રાન્તિ જો;
ને એ કુંજ વિશે આંસું-અમીબિન્દુડાં
થોડાં થોડાં પાડી પામું શાન્તિ જો.
આંસુંડા શિદ ઢોળું૦ ૨
જીવન ભરિયું આંસુતણા અમીપૂરથી,
હૃદય હૃદય વ્હે રેલ ઘણી અશ્રુતણી;
મનુજબન્ધુનાં આંસુ કેરા સિન્ધુમાં
મુજ આંસુ તણી ઝીણી સેર જજો શમી !
આંસુંડા શિદ ઢોળું૦ ૩
- ↑ *ઑધવજી સંદશો કહેજો શ્યામને’ — એ ચાલ.