સમજી લે કે તારી સત્તા તો તારા વિજયદિનથી જ ઓસરી ગઈ છે.
રાજન : તો તું સત્તા લઈ કેમ લેતો નથી ? સહી કરી નાખ.
વીર : માનવજાતમાં એકાદ વીર પણ પૈસાથી વેચાતો મળતો નથી એટલું સાબિત કરવા ! બદલો મળ્યા વગરની સત્તા મળશે ત્યારે હું સત્તા ઉપર હોઈશ. આજ નહિ !
ધનપાળ : તારા સરખા કંઈક વીર મારી પાસે વેચાઈ ચૂક્યા છે, વીર ! તારા વગર ચાલશે.
વીર : ધનપાળ ! સમજી લે, જો જરા આંખ ખોલ. તારી પુષ્પસૃષ્ટિમાં દાવાનળ પ્રગટ્યો છે !... કોઈ કોઈ વાર અગ્નિ વેચાતો ન મળે...તને અને તારી ખરીદેલી સૃષ્ટિને મફત મળ્યો છે...
[આછો આછો અગ્નિ દેખાય છે. ]
ધનપાળ : એવા કંઈક દાવાનળ હોલવી નાખ્યા!
વીર : પણ એ ધનની વૃષ્ટિથી નહિ! બદલો માગતું વીરત્વ, બદલો માગતું સૌન્દર્ય, બદલો માગતી સેવા અને બદલો માગતું ધન શાપરૂપ છે...યાદ રાખ જ તને અને તારી સૃષ્ટિને બાળી નાખશે.
ધનપાળ : શાપનો મને ભય નથી.
વીર : જરા આંખ ખોલ ! તારી આસપાસ જો ! આ પુષ્પસૃષ્ટિ સૂકાઈ ચાલી ! એના ઉપર અગ્નિ વરસે છે!
[અગ્નિ પ્રજળતો દેખાય છે. ]
- પુષ્પસૃષ્ટિએ તારી જોડે અસહકાર આદર્યો છે અને તારા ધનને પણ નિરર્થક બનાવ્યું છે ! એકે પુષ્પ ખીલતું નથી, એકે પર્ણ લીલું નથી. અને...અને સાંભળ ! તારે હાટે તાળાં વસાય છે તે !
[ તાળાંસાંકળ વસાતાં સંભળાય છે. ]
ધનપાળ : મારે હાટે તાળાં ? હું દાવો કરીશ, ‘બેલિફ’ લાવીશ, જપ્તી કરીશ, આખી પુષ્પસૃષ્ટિની હું હરાજી બોલાવીશ...પુષ્પસૃષ્ટિનો અસહકાર હું નહિં સાંખી લઉં!
