આ પાનાનું પ્રુફરીડિંગ થઈ ગયું છે
શીળાં નદી કેરાં નીર,
શીળાં શાં સરોવરો રે, માણારાજ !
અાંબલિયો એ ઉદાર
રસેભર્યો રાજતો રે, માણારાજ !
અંતરનો એ આરામ
મગનમહિં ગાજતો રે, માણારાજ !
ડાળિયે દેવના વાસ,
પ્રીતિ ઝરે પાંદડે રે, માણારાજ !
સુરભિએ અાભ સિંચાય,
સુધા એને છાંયડે રે માણારાજ !
ત્યાં રમતા અમે રાસ
સાહેલીના સંગમાં રે, માણારાજ !
ખેલતાં બાલુડાં ખેલ
અનેરા ઉમંગમાં રે, માણારાજ !
ત્યાં નહિ તરણિના તાપ,
વાયુના વંટોળિયા રે, માણારાજ !
ત્યાં નહિ મેધના માર,
રજે નહિ રોળિયાં રે, માણારાજ!
વેરભર્યા વિખવાદ
કાને કદી નવ પડે રે, માણારાજ !