આ પાનાનું પ્રુફરીડિંગ થઈ ગયું છે
૧૦૮
રાસચંદ્રિકા
નવરાજનાં વધામણાં
♦ ઓધવ, નંદનો છોરો તે નમેરો થાય જો. ♦
સખી ! આવો નવરાજને વધાવીએ રે !
સખી ! સ્નેહભર્યાં તેજમાં સજાવીએ રે ! ૧
સખી ! પુણ્યસોહ્યાં આંગણાં સુહાવજો રે !
સખી ! ચારુ નીતિચોક પૂરી આવજો રે ! ૨
સખી ! વહાણેલાં જો વાયાં શાં સોહામણાં રે !
સખી ! આપે નવરાજનાં વધામણાં રે. ૩
સખી ! કાળી કાળી વાત ડૂબી રાતમાં રે ;
સખી ! આવો અહીં ઊજળા પ્રભાતમાં રે ! ૪
સખી ! ધરણી ઉઘાડે ભવ્ય બારણાં રે,
સખી ! લઇયે નવરાજનાં વધામણાં રે ! ૫
સખી ! સુખભરી થાળ રૂડી લાવજો રે !
સખી ! પ્રેમભક્તિજ્યોતિ મહીં જમાવજો રે ! ૬
