આ પાનાનું પ્રુફરીડિંગ થઈ ગયું છે
ગૃહમંડપ
૧૩૫
બહેનને આંગણે
♦ સનખપુરા સાચી મા બહુચરા. ♦
આવો, વીરા આવોની મારે આંગણે !
વેરું સ્નેહનાં કુસુમ સારે આંગણે. ૧
વીરા, છાંટું સુધાનો છંટકાવ જો,
ભરું બારને પ્રભાતનો પ્રભાવ જો ! ૨
આજે માતજાયો આવે મારે ઝૂંપડે,
એની બહેનડીનું હૈયું વીલું શું પડે ! ૩
આજે હૈયાના મર્મ કંઈ ખોલશું ;
સુખદુઃખના બે બોલ કંઈ બોલશું. ૪
મારા વીરાનાં લેઉં સહુ દુઃખડાં,
થજો કાળાં પાપીનાં ભૂંડા મુખડાં ! ૫
ભૂંડું જગત કરે ને વદે વાકડું,
નડો તે ના વીરાનું ઉર રાંકડું ! ૬
મારા વીરાને તે નહીં સંતાપશે,
વીરા માટે બહેની આ પ્રાણ આપશે ! ૭