પૃષ્ઠ:Raschandrika Part 1 and 2.pdf/૧૪૯

વિકિસ્રોતમાંથી
આ પાનાનું પ્રુફરીડિંગ થઈ ગયું છે
૧૪૦
રાસચંદ્રિકા
 


રંગે ભરી મારી રાખડી રે,
અદ્‌ભુત રચાયું એનું તંત્ર રે, વીરાજી મારા !
બાંધો બળેવની રાખડી રે !
ગૂંથી એ વહાલને તાંતને રે,
મોંઘા મળ્યા છે મહીં મંત્ર રે, વીરાજી મારા !
બાંધો બળેવની રાખડી રે ! ૨

લળકે કો દેવની આંખડી રે,
એવું લળકે છે એનું ફૂલ રે, વીરાજી મારા !
બાંધો બળેવની રાખડી રે !
બાંધ્યું છે દિલને દોરલે રે
બહેનીનું હેત કંઈ અતૂલ રે, વીરાજી મારા !
બાંધો બળેવની રાખડી રે ! ૩

વીરો કુળાવાડીનો મોરલો રે,
હયું ઠર્યાંનું એક ઠામ રે, વીરાજી મારા !
બાંધો બળેવની રાખડી રે !
સાત પેઢીનો થાંભલો રે,
બહેનીની આંખનો આરામ રે, વીરાજી મારા !
બાંધો બળેવની રાખડી રે ! ૪