આ પાનાનું પ્રુફરીડિંગ થઈ ગયું છે
૧૬૨
રાસચંદ્રિકા
દૂધડાં દોહતી
♦ રાતડલી રળિયામણી, મનમોહનજી. ♦
ગોરાં ઉજાસ, ગોરાં વ્યાણલાં, મનમોહનજી !
ગોરાં ગોરાં ગોકુલનાં ગામ :
દૂધડાં દોહું રે, મનમોહનજી !
ગોરી ચમેલી, ગોરી વાદળી, મનમોહનજી !
ગોરી ગોરી હું ને ત્હમે શ્યામ :
દૂધડાં દોહું રે, મનમોહનજી ! ૧
કાળી ભૃકુટી, કાળી આંખડી, મનમોહનજી !
કાલી કાલી ત્હમારી વાત :
દૂધડાં દોહું રે, મનમોહનજી !
આવી અડપલાં મા કરો, મનમોહનજી !
મ્હારા દૂધ દોહવણિયા હાથ :
દૂધડાં દોહું રે, મનમોહનજી ! ૨
કાળાં અખાડિયાં આભલાં, મનમોહનજી !
કાળા કાજળિયા અંધાર :
દૂધડાં દોહું રે, મનમોહનજી !
કાળી કાળી મ્હારી ગાવડી, મનમોહનજી !
ત્હેની ગોરી આ દૂધની ધાર :
દૂધડાં દોહું રે, મનમોહનજી ! ૩
