આ પાનાનું પ્રુફરીડિંગ થઈ ગયું છે
દાંપત્ય
૨૨૫
સંધ્યાનાં સોણલાં
♦ રાતલડી રળિયામણી, મનમોહનજી. ♦
કૂંળી ઉષા, કૂંળા આભલાં, મુજ વહાલમજી !
કૂંળા કૂંળા સૂરજના પાદ:
ભૂલશો સોણલાં તે, મુજ વહાલમજી?
મોંઘી વસંત, મોંઘાં ફૂલડાં; મુજ વહાલમજી!
મોંઘા ઉર ઉરના આહ્લાદ:
ભૂલશો સોણલાં તે, મુજ વહાલમજી? ૧
હૈડે લીલા લચી કૈં હતી,મુજ વહાલમજી !
કરતી કોયલ ટહુકાર:
ભૂલશો સોણલાં તે, મુજ વહાલમજી?
જોબન હતાં જાદુભર્યાં, મુજ વહાલમજી !
આંખે ઓજસના અંબાર:
ભૂલશો સોણલાં તે, મુજ વહાલમજી? ૨
આંજણ અંજાયાં આંખમાં, મુજ વહાલમજી
દીઠી અદ્ભૂત સોનલ દેહ:
ભૂલશો સોણલાં તે, મુજ વહાલમજી?
દીધાં-લીધાં દેહદાન એ, મુજ વહાલમજી!
મૉર્યા ફાલ્યા તે અમૃતનેહ:
ભૂલશો સોણલાં તે, મુજ વહાલમજી? ૩
