આ પાનાનું પ્રુફરીડિંગ થઈ ગયું છે
૨૭૭
રાસચંદ્રિકા
આછાં આછાં અધૂરાં ગીત કંઇ ગાયાં,
ને ઊડ્યાં ઊંચે આભલે રે લોલ ;
સંધ્યાઉરે સરતી દૂર પંખીડાંની પાંખો,
કો વિરલાં સાંભળે રે લોલ ;
આપ્યા કે ન આપ્યા એ આત્મના સંદેશા,
કે સોણલાં સંકેલવાં રે લોલ :
ક્યાંથી એવાં ભાગ્યે, મુજ યજમાન !
અમૃત સદા રેલવાં રે લોલ ? ૩
નથી નથી રાજસુહાગ રતનિયાં,
કે મઢું તમ પાવલે રે લોલ ;
નથી નથી મોહનનૂર મોતીડાં,
ઉડાવું તમ રાવલે રે લોલ :
એક મારા દિલનાં ફૂલડાં વેરું,
નમન કરું નેહનાં રે લોલ ;
સ્વીકારો મારાં મોંઘેરાં યજમાન !
વંદન આત્મદેહનાં રે લોલ ! ૪
