આ પાનાનું પ્રુફરીડિંગ થઈ ગયું છે
આમંત્રણ
૨૯
બૃહદ્ગુજરાતની બહેનોને
♦ ઇતિહાસની આરસી સાહી, મેં જોયું માંહીં ♦
વહાલાં ! આવોને આંગણ આજ, ઊતર્યાં અજવાળાં;
મોંઘી ગુર્જરી માતને કાજ રહિયે રઢિયળાં ! ૧
ઊઘડી ચોમેર દિગંત, નીગળે રસધારા;
ગ્રહી કિરણ કિરણના તંત, ગૂથિયે દિન ન્યારા. ૨
આ આથમણે અંધાર પૂર્યા જડપણમાં,
આ ચેતનના ચમકાર ચમક્યા ઉગમણમાં ! ૩
આવો-અવોને રસિયાં સર્વ, ગરબે રમવાને !
ગુણી ગુજરાતણનો ગર્વ રાખોને રસદાને ! ૪
હો સુંદર ને સુકુમાર, નાજુક નખરાળી;
હો ચંચળ ચતુરા નાર, હો બુદ્ધિશાળી ! ૫
શાણી, શીલવંતિ ઠરેલ, ગૃહિણી ગુણગારી;
રૂપ રૂપ ને રંગ રસેલ, અલબેલી ન્યારી ! ૬
તેજસ્વી, જાજરમાન, સિંહણશી શૂરી;
સાગરશી સ્નેહનિધાન, પ્રતાપે હો પૂરી ! ૭
