પૃષ્ઠ:Rashtrika - Gu - By Ardeshar Khabardar - 1940.pdf/૧૭૩

વિકિસ્રોતમાંથી
આ પાનાનું પ્રુફરીડિંગ થઈ ગયું છે
૧૬૮
રાષ્ટ્રિકા
 


આકાશનાં ઊઘડતાં ગૃહદ્વારમાં શી
કો મુગ્ધ સુંદરીશું આવી લળે તું ખાસી !
હા, જાણું કહેણ કંઈ મીઠલડાં તું લાવે,
જે જાગતે ઉર ઉમંગ ભરે પ્રભાવે.

તું તો પ્રભાતતણી દૂતી પવિત્ર શી છે,
આવી પ્રભાકરતણી પધરામણી દે !
આકાશદેવી શરમે થઈ જાય રાતી,
ને તું પછી ખસી જઈ તહીં લુપ્ત થાતી.

ક્યારે પ્રતાપી ત્યમ તે જયભાનુ આવી
જ્યોતિપ્રવાહ મહીં હિંદ દિયે ડુબાવી ?
આકાશશું નવલ ભારત રંગ ધારે, --
દે શુક્ર ! એવી અમને સુવધાઇ ભારે !

થા હિન્દનો સુઘડ તું શણગાર પ્યારો,
દીપાવ શ્રેષ્ઠ મુજ હિન્દતણો કિનારો,
શોભાવ તું નવલ હિન્દધજા ધરાએ,
અંકાવ આબ ખૂબ હિન્દતણું સહાયે !

તારું દરેક સ્મિત પંથ સુહાવશે જો,
તારા કરો નવલ તેજ જમાવશે જો,
તારું અમીઝરણ શીતળ શાંતિ દેશે,
તારાં જ ગૂઢ કવિતો સહુ કાર્ય કહેશે.