આ પાનાનું પ્રુફરીડિંગ થઈ ગયું છે
૧૦
રાષ્ટ્રિકા
હો મારી ગુજરાત
• ખટપાંખડી છંદ*[૧]•
હો મારી ગુજરાત ! તુજને કોણ ન ચા'શે ગર્વે ?
અર્પણ કોણ ન કરશે સર્વે ?
તુજ પર કોણ ન વારી દેશે જીવન લાખે ક્રોડે ખર્વે,
તારા વિજ્યતણા તે પર્વે ?
કોની છાતી નવ ફૂલાશે તારું એક જ નામ ઉચરવે,
‘હો મુજ માત’, કહી મુખ ભરવે ?
હો મારી ગુજરાત ! તારા શૌર્યભર્યાં સંતાનો :
ગજવી દે સાતે આસ્માનો !
તારી ધજા ઊડવતા છે તારા પણ અર્જુન ને હનુમાનો :
તારો પરમ સારથી કહાનો :
તારા દયાનંદ ને મોહન જેવાં યુગયુગ વીર નિશાનો :
હો મા ! શાં કરીએ ગુણગાનો !
- ↑ *આ છંદ નવો રચ્યો છે. પ્રથમ ચરણમાં ૨૭ માત્રા છે, ને તાલ ૧-૫-૯-૧૨-૧૬-૨૦-૨૪ માત્રાઓ પર છે ને એ ચરણની ૧૧ મી માત્રા લઘુ જ જોઈએ. ત્રીજા ને પાંચમા ચરણમાં ૩૨ માત્રા છે ને તાલ ૧-૫-૯-૧૩-૧૭-૨૧-૨૫-૨૯ માત્રાઓ પર છે. બીજા, ચોથા ને છઠ્ઠા ચરણમાં ૧૬ માત્રા છે ને તાલ ૧-૫-૯-૧૩ માત્રાઓ પર છે.
