આ પાનાનું પ્રુફરીડિંગ થઈ ગયું છે
ગુજરાતનાં ગીતો
૧૧
હો મારી ગુજરાત ! તારા ભક્તો, કવિઓ, જ્ઞાની :
તારા છપ્પનકોટિ દાની :
તારા ખંડેખંડ સુહવતા સાહસશૂરા પુત્ર સ્વમાની :
તુજ પુત્રીઓની કુરબાની :
તારી ફળફૂલવંતી કુંજોની શી જગતભરી મહેમાની !
હો મા ! પૂજિયે નિત તુજ પાની !
હો મારી ગુજરાત ! સૌને સૌનો દેશ મુબારક !
તું તો સૌની છે ઉદ્ધારક :
તારાં ધર્મવચન પ્રભુપથનાં જગમાં છે નિત સત્યપ્રચારક,
પુણ્યપ્રકાશક, પાપવિદારક :
યુગયુગના ગમગનાગમને સ્થિર ચળકે તું જાણે ધ્રુવતારક :
હો મા ! તું તો વિસ્મયકારક !
હો મારી ગુજરાત ! તારો શો જગને સંદેશો !
કાપે સૌના આત્મન્ક્લેશો :
તે તો દેવપ્રભભર દીધા જગને કંઇ અદ્ભુત આદેશો :
જડહ્રદયે તણખો જગવે શો !
તરો સાત્વિક સંયમશીળો શૂરો મંત્ર જીવન ફૂંકે શો !
હો મા ! ક્યારે અમ વિધિ કહેશો ?
