પૃષ્ઠ:Rashtrika - Gu - By Ardeshar Khabardar - 1940.pdf/૩૩

૨૦

રાષ્ટ્રિકા

 

---

વૃક્ષે, વિટપે, કુંજનિકુંજે, વનમાં, ખેતરે ,
⁠લોચન ભરતી લૂમેઝૂમે લીલા લાખ ;
પાક્યાં જ્યાં સોનેરી તૂલ બધે ઝૂલી રહે ,
⁠એવી લીલાભર ગુર્જરી ઠારે સહુ આંખ !
⁠એ ટાણે ગુજરાતે રહેવું કેવું છે રૂડું ! ૪

લક્ષ્મીનાં પગલાં નવધાન્યે નવકુસુમે પડે ,
⁠છલછલ છલકી રહે કુદરતકેરી રસછાબ ;
કાવ્યે ગીતે નૃત્યે સરસ્વતી આરાધતી
⁠ગરબે ઘૂમતીગ ગુર્જરી વેરે કંઠગુલાબ !
⁠એ ટાણે ગુજરાતે રહેવું કેવું છે રૂડું ! ૫

ખીલે પચરંગી ગુલબાસ અને બપ્પોરિયા ,
⁠શોભે કાસતણી માંજર નવધવલે રંગ ;
હીંચે સરવરમાં રાતાં કમળો ને પોયણાં ,
⁠ગાજે ગુર્જરીના ત્યાં ગરવા કલાપ્રસંગ !
⁠એ ટાણે ગુજરાતે રહેવું કેવું છે રૂડું ! ૬

માણેકઠારી પૂનમે દૂધપૌંઆ ને ચાંદની ,
⁠દશરાને કુંકુમ દેવીના આશીર્વાદ ;
મંગલ પર્વે પર્વે ઊતરે શા રસપૂજને
⁠મોંઘા ગુર્જર સુંદરીના સૌંદર્યપ્રસાદ !
⁠એ ટાણે ગુજરાતે રહેવું કેવું છે રૂડું ! ૭