આ પાનું પ્રમાણિત થઈ ગયું છે.
વેલો બાવો
૧૦૯
મૈયારી ગામના ગરાસીઆ રાણીંગ મેર પણ વેલાના દાસ બન્યા. એણે ભજન આદર્યા :
- રાણીંગદાસ સરભંગી સાબના ચેલા.
- રાણીંગદાસ ગિરનારી સાબના ચેલા.
- મેલી મયારી ને મેલી રે મમતા
- હુવા ગરાસીઆ ઘેલા - રાણીંગદાસ૦
- મેલી મયારી ને મેલી રે મમતા
- ગરવેથી ગેબી જોર બજાવે ને
- પાયા પિયાલા લઈ પૂરા - રાણીંગદાસ૦
- ગરવેથી ગેબી જોર બજાવે ને
- પીયા પિયાલા મગન ભયા મન
- છૂટી સેનામાં ગજ ગેલા - રાણીંગદાસ૦
- પીયા પિયાલા મગન ભયા મન
- શબદે મારે ને શબદે જીવાડે ધણી
- શબદ સૂકાને કરે લીલા - રાણીંગદાસ૦
- શબદે મારે ને શબદે જીવાડે ધણી
- વેલનાથ ચરણે બોલ્યા રાણીંગદાસ
- માતા મીણાં ને પિતા વેલા - રાણીંગદાસ૦
- વેલનાથ ચરણે બોલ્યા રાણીંગદાસ
ભૈરવ–જપના શિખરની નજીક સાત વીરડા છે. એ વીરડા વેલા બાવાના કહેવાય છે. દર વર્ષે મહા શિવરાત્રિના મેળા વખતે એક વેલા બાવાના વંશ માંહેલો માણસ ને એક સેંજળીઆ કણબીનો કુટુંબી એ વીરડા પર જાય છે. પાંદડાનો કુચો વાળી ચોળી વીરડા સાફ કરે છે. લોબાનનો ધૂપ પેટાવે છે. પછી એકતારાના સૂર સાથે આરાધ ઉપાડે છે કે:
- આવો તો આનંદ થાય
- નાવો તો પત જાય રે :
- ગરવા વાળા નાથ વેલા !
- આ રે અવસર આવજો !
- આવો તો આનંદ થાય