યાદ રહેતાં નથી. "
" આટલી વાર ગાયાં છતાં પણ ? "
" મારી આંખો પર ગરમ ગરમ રસ રેડતા'તા આજે. "
" ગાંડી, એ તો રંગબેરંગી રોશની હતી. "
" મારે તો એ અંધારું હતું. તને જોઈ નહોતી શકતી. મારા પગ તાલ ભૂલતા હતા. હું તાલ ભૂલીશ તો તું દોર પરથી પડી જવાનો. "
" આપણે ભાગી જશું, બદલી ? "
" કેમ ? "
"બુઢ્ઢો આપણને છોડી તો નહિ જાય ? "
" શા માટે ? "
" બુઢ્ઢાએ આજ વાંદરીનું બચ્ચું વેચી નાખ્યું. મને બીક લાગે છે. આપણને પણ એ વેચે તો ? "
" આજ કોઈ બુઢ્ઢા જોડે વાત કરતું'તું. "
" શાની ? "
બદલી ચારે બાજુ મોં ફેરવી નાકની હવામાં ગંધ સૂંઘવા લાગી.
" આંહીં કોઈ નથી. " ઝંડૂરે કહ્યું.
" કોઈક આપણને જુએ છે. મને ગંધ આવે છે. "
" ધીમે ધીમે કહે - કહી દે. શાની વાત કરતું'તું ? "
" મને આપી દેવાની. "
" કોને આપી દેવાની ? "
" કોઈક તમાશાવાળાને. "
" બુઢ્ઢાએ હા પાડી ? "
" ઘડીક ના ને ઘડીક હા પાડતો હતો. સિનેમાવાળો ઘણા બધા રૂપેલા દેવા કહેતો હતો. "
" તને જવા દિલ હોય તો સારી વાત છે, બદલી ! "
બદલીએ ઝંડૂરના હોઠ પર ફરી વાર આંગળાં ફેરવ્યાં, ને કહ્યું : " મને મેલી જા ! "