આ પાનું પ્રમાણિત થઈ ગયું છે.
નીંદરભરી રે ગુલાલે ભરી
બેની બાની આંખડી નીંદર ભરી રે !
નીંદરને દેશ બેની નત્ય નત્ય જાતાં,
અંકાશી હિંચકાની હોડી કરી – બેનીબાની૦
દોરી તાણીને વીર મારે હલેસાં,
હાલાં વાયાં ને હોડી વેગે ચડી – બેનીબાની૦
નીંદર બેઠી છે નીલ સમદરના બેટમાં,
કેસરીયા દૂધના કટોરા ધરી – બેનીબાની૦
નીંદરનો બાગ કાંઈ લૂંબે ને ઝુંબે,
કળીઓ નીતારીને કચોળી ભરી – બેનીબાની૦
સીંચ્યાં એ તેલ મારી બેનીને માથડે
નાવણ દેતી રે ચાર દરિયાપરી – બેનીબાની૦
છીપોની વેલડીને જોડ્યા જળ-ઘોડલા,
બેસીને બેન જાય મુસાફરી – બેનીબાની૦
સાતે સિંધુને તીર સફરો રે કીધી,
સુરજ ઉગ્યો ને બેન આવ્યાં ફરી – બેનીબાની૦
