ભડલી વાક્ય/કારતક માસ
| ભડલી વાક્ય કારતક માસ ભડલી |
માગસર માસ → |
નામ જણાવે ગર્ભનું, જોશિ એમ સે'દેવ;
ગર્ભ કહે તે જાણજો, માસ માસમાં એવ. (૧)
વાદળ વાયુવિજ વરસંત, કડકે ગાજે ઉપલ પડંત;
ધનુષ અને પરિવેષે જાણ, હીમ પડે દશ ગર્ભ પ્રમાણ (૨)
કારતક માસ
કાર્તિક સુદિ પડવા દિને, જો હોયે બુધવાર;
વર્ષ હોય તે કરવરૂં, ન કરિશ વળી વિચાર, (૩)
દીવા વીતી પંચમાં, આવે જો રવિવાર;
ધન કણ રાખી સંગ્રહી, હું તુજ પુરું નાર, (૪)
માળવડે મરકી થશે, દક્ષિણમાં ઉતપાત;
પૂર્વે વિગ્રહ જાગશે, ખળભળશે ગુજરાત. (૫)
અખાના છપાની ચાલ
કાર્તિક સુદિ બારશને દેખ, માર્ગશિર્ષ સુદિ દશમ પેખ;
પોષ સુદી પાંચેમ વિચાર, માઘ સુદી સાતમ નિરધાર;
ને દિન જો મેઘો ગાજંત, માસ ચાર અંબર વરસંત. (૬)
કાર્તિક સુદિ એકાદશી, વાદળ વિજળી હોય;
અષાડમાં ભડળી કહે, વરખા સાચો જોય. (૭)
કાર્તિક સુદિ પૂનમ દિને, જો કૃતિકા કદિ હોય;
તેમાં વાદળ વિજળી, જોસ જોગશું સોય, (૮)
કાર્તિક પૂનમ કૃતિકા; અદકી હોય જ જેમ;
પળો વધે જે વર્ષનાં, ભારે વરખા એમ. (૯)
જૂઓ જોશિ કાર્તિકિ અમાસ, રવી શની ભોમે જો વાસ;
સ્વાતિ યોગ આયુષ તે પાસ, કાળ કરાવે નાસા નાસ. (૧૦)
સુદિ બારશ મેઘો જો હોય, અશાડ માસે વરસે જોય;
માસ અવર પણ વરસ જાણ, કે'છે ભડલી સાચ પ્રમાણ (૧૧)