ભવસાગર

by દામોદર બોટાદકર

ભવસાગર દામોદર બોટાદકર

(ઢાળ : ચાલો જોવાને જઈયે)

<poem> જો ! જો ! સખિ ! પેલો સાગર ગાજે, રંગતરંગ શા રાજે રે! ભવસાગર ગાજે.

ગાન મધુર રહે કંઈ ગાતો, કૈંક વદે ઝીણી વાતો રે: ભવસાગર૦

એ સ્હમજે ઉર કોઈ સુહાગી, જે રસના અનુતરાગી રે: ભવસાગર૦

માહિં ભર્યા મોંઘા મૂલનાં મોતી, ગુણિયલ લે જન ગોતી રે: ભવસાગર૦

ઉભા ખડક એના ઉરમાં, આલિ! નાવિક રહે છે, નિહાળી રે : ભવસાગર૦

સ્હામે તીરે પ્રભુધામ પનોતાં, જગતની વાટાડી જોતાં રે : ભવસાગર૦

કૈંક તરે, વળી કૈંક તરેલાં દેવને દેશ વરેલાં રે : ભવસાગર૦

ભાર ભર્યાં બહુ ડૂબતાં દીઠાં, જે મનમાં નહિં મીઠાં રે : ભવસાગર૦

ચાલો, સખિ ! એમાં સંગ ઉતરીયે તીરને પામવા તરિયે રે : ભવસાગર૦

હેત તણી રચિયે રૂડી હોડી, જાય તરી દોડી દોડી રે : ભવસાગર૦