યુગવંદના/સાગર રાણો
| ← હસતું પંખી | યુગવંદના સાગર રાણો ઝવેરચંદ મેઘાણી ૧૯૩૧ |
અર્પણ → |
માલા ગૂંથી ગૂંથી લાવે –
સાગર રાણો ફૂલડાં ગૂંથી ગૂંથી લાવે :
ધરતીને હૈયે પે'રાવે –
સાગર રાણો ફૂલડાં ગૂંથી ગૂંથી લાવે.
આઘે આઘે એની અનુપમ વાડી,
ચાંદો સૂરજ રૂડા રાખ્યા બે માળી:
વિધવિધ વેલડી વાવે –
સાગર રાણો ફૂલડાં ગૂંથી ગૂંથી લાવે. — માલા૦
ઊંડે પાતાળે ગાળ્યા એણે ક્યારા,
રોણા રાતલડીના રંગત તારા :
નવલખ નદીઓ સિંચાવે –
સાગર રાણો ફૂલડાં ગૂંથી ગૂંથી લાવે. — માલા૦
સોનલ ફૂલડે સવાર મલકતા,
સંધ્યાના થાળ ગુલાબે છલકતાં :
રજનીમાં ડોલર આવે –
સાગર રાણો ફૂલડાં ગૂંથી ગૂંથી લાવે. — માલા૦
રાત દિવસ બીજાં કામ ન ફાવે,
ગાંડો પિયુજી લાખો ગેંદ ગૂંથાવે:
જૂજવા રંગ મિલાવે –
સાગર રાણો ફૂલડાં ગૂંથી ગૂંથી લાવે. — માલા૦
રીસભરી ધરણી નવ રીઝે,
સ્વામીનાં દાન ત્રોડી ત્રોડી ખીજે :
દરિયો વિલાપ ગજાવે –-
સાગર રાણો ફૂલડાં ગૂંથી ગૂંથી લાવે. — માલા૦
યુગ યુગના અણભંગ અબોલા,
સૂના સાગર કેરા હૈયા-હિંડોળા :
ગરીબડો થઈને બોલાવે –
સાગર રાણો ફૂલડાં ગૂંથી ગૂંથી લાવે. — માલા૦
કરુણાળુ બોલ કહાવે –
સાગર રાણો ફૂલડાં ગૂંથી ગૂંથી લાવે,
ગેબીલા શબદ સુણાવે –
સાગર રાણો ફૂલડાં ગૂંથી ગૂંથી લાવે.
ચરણ ચૂમી ચૂમી ગાવે -
સાગર રાણો ફૂલડાં ગૂંથી ગૂંથી લાવે.
માલા ગૂંથી લૂંથી લાવે –
સાગર રાણો ફૂલડાં ગૂંથી ગૂંથી લાવે.
ધરતીને હૈયે પેરાવે –
સાગર રાણો ફૂલડાં ગૂંથી ગૂંથી લાવે.