રાઈનો પર્વત/અંક પહેલો/ પ્રવેશ ૨ જો

by રમણભાઈ મહિપતરામ નીલકંઠ

←  અંક પહેલો: પ્રવેશ ૧

રાઈનો પર્વત અંક પહેલો: પ્રવેશ ૨ રમણભાઈ મહિપતરામ નીલકંઠ

અંક પહેલો: પ્રવેશ ૩ →

પ્રવેશ ૨ જો

સ્થળ : કિસલવાડી

[ખભે તીરનું ભાથું અને કામઠું લઈ પથ્થર પર બેઠેલો રાઈ પ્રવેશ કરે છે. ]

રાઈ :

રાત્રિ ! તારા અંધકાર કરતાં વધારે ઘેરાં આવરણ મારા જીવનની આસપાસા ફરી વળેલાં છે. હું કોણ છું, જાલકા કોણ છે, જાલકા પાસે દ્રવ્યસાધન છતાં શા માટે તે નગરમાં ફૂલ વેચવા જાય છે, મારે વાંચવા માટે પુસ્તકો શા માટે લઈ આવે છે, મારા ધનુર્વિદ્યાના શોખને શા માટે ઉત્તેજન આપે છે, મારે ચઢવા સારુ ઘોડા શામાટે આણી આપે છે, અને તે છતાં, મને માળીને વેષે શા માટે રાખે છે, અને વળી, હું તેની ઈચ્છાને શા માટે અનુસરું છું : એ સરવા આ અંધકારથી પણ વધારે અગમ્ય છે. (ઊભો થઈને) પરન્તુ માણસના જીવનમાં કયે સ્થળે અગમ્યતા સામી આવીને ઊભી રહેતી નથી. (શાર્દૂલવિક્રીડિત) આત્મા શોણીતા માંસ અસ્થિની ગુફા અંધારી તેમાં પૂર્યો, ઉત્સાહી અભિલાષ, દુર્લભ ઘણા સંસાર તેથી ભર્યો; રોકાયો પુરુષાર્થ કારણ અને કાર્યોતણી બેડિથી, ઘેરાઈ સઘળે અગમ્ય ઘટના સંકલ્પ થંભાવતી. ૪

(થોડું ચાલીને) અને વળી, જાલકાએ સૂકાઈ ગયેલા ઝાડને લીલું કરવાનો આ મિથ્યા પ્રયત્ન શા માટે આદર્યો

	છે? જેનું જીવનબળ ગયું તેનો ફરી વિકાસ થયો કદી સાંભળ્યો છે? (મન્દાક્રાંન્તા) પીળાં પર્ણો ફરી નથી થતાં કોઈ કાળે જ લીલાં, ભાગ્યાં હૈયાં ફરિ નથી થતાં કોઈ કાળે રસીલાં; પામે વૃદ્ધિ ક્ષય પછી શશી, - પ્રાણિનું એ ન ભાવી, ના’વે એને ભરતિ કદિ જ્યાં એકદા ઓટ આવી. ૫ [આમ તેમ ફરે છે]
	(એકાએક ઊભો રહીને) પાનાં રાખો ! (કાન દઈને) પણે આઘે છેક દક્ષિણે ખડખડાટ સંભળાય છે. એ જ પેલું પશુ ! (કામઠું લઈ તે પર તીર ચઢાવીને) અંધારામાં કંઈ દેખાતું નથી, પણ, આ શબ્દવેધી બાણ એને આબાદ વાગશે. (અવાજની દિશામાં બાણ છોડે છે.) બાણ તો બરાબર એ તરફ ગયું. [એકાએક ચીસ સંભળાય છે. પછી ભૂમ સંભળાય છેકે ‘ગજબ ! ગજબ ! રે ! કોઈ આવો રે !’ રાઈ તે તરફ દોડતો જાય છે.]