રાષ્ટ્રિકા/વંટોળિયો ને વેરાગણ

વિકિસ્રોતમાંથી
Jump to navigation Jump to search
આ કૃતિ/પાનું હમણાં જ અહીં લાવ્યા છીએ અને તેની ભૂલશુદ્ધિ (પ્રૂફ રીડીંગ) બાકી છે. જો તેમાં કોઈ ભૂલો જણાય તો ક્ષમા કરશો, થોડા સમયમાં આનું શુદ્ધિકરણ કરીને તેને આખરી ઓપ આપી દેવામાં આવશે.
← બ્રીટનને રાષ્ટ્રિકા
વંટોળિયો ને વેરાગણ
અરદેશર ખબરદાર
સાવધાન ! →
* રાગ માઢ[૧] *


ફું ફું વાતા વાયરા ને આભે ઊડતી ધૂળ :
આવ રે વંટોળિયા ! તારે પગલે પગલે શૂળ !
ફું ફું વાતા વાયરા.--

એવડી ધૂળ ક્યાં ફૂંકશો ? મારી મોટી દેશળ ભોમ;--
વાહ રે વેરાગણ વહાલુડી ! તારું ભરી દ‌ઉં આખું વ્યોમ !
ફું ફું વાતા વાયરા.-- ૧

ગાજરવરણી રાતુડી આંખે છુપલાં વરસે ઝેર ;
જ્વાળા ફૂંકી વરસાવજો ભલે ચોગમ કાળો કહેર !
ફું ફું વાતા વાયરા.-- ૨

આજ સમરની વાતડી, મારે છૂંદવાં લાખો શીર ;--
કાળા વેરાનમાં રાજ પછી શું કરશે ધૂળિયા ફકીર ?
ફું ફું વાતા વાયરા.-- ૩

ઘૂમઘૂમ કરતાં ઘેલડાં ને અંતર બળતી આગ ;
વાજો વંટોળિયા ! મનગમ્યું, બની કાળછંછેડ્યા નાગ !
ફું ફું વાતા વાયરા.-- ૪

એક તો કરણીનાં કૂટણાં, ને બીજા ઠગારા સૂર ;
ત્રીજાં ત્રિખંડે મચાવવાં મારાં કર્મ અક્ષત્રી ક્રૂર !
ફું ફું વાતા વાયરા.-- ૫

શૂરા જગાડિયા જોધવા, ને પૂરા જગાડિયા લોક ;
ઘૂમી ઘૂમીને વંટોળિયા ! તું તો આખર બનશે ફોક !
ફું ફું વાતા વાયરા.-- ૬

આભે ઊડતી ધૂળ આ તારી તો સ્નેહ સમા મુજ મેહ :
ગર્વ નિભે નહીં આટલો : હવે ભૂલી જજે તુજ છેહ !
ફું ફું વાતા વાયરા.-- ૭

-૦-

નોંધ[ફેરફાર કરો]

  1. "રાસચંદ્રિકા"માંના "મઘમઘ કરતો મોગરો ને થાળી જેવડાં ફૂલ" એ રાસનું આ પ્રતિકાવ્ય છે.

(પૂર્ણ)