રાસચંદ્રિકા/આંસુનાં પૂર
← દુઃખની દેવી | રાસચંદ્રિકા આંસુનાં પૂર અરદેશર ખબરદાર |
વહાલીડાં ! કેમ કરીએ ? → |
આંસુનાં પૂર
♦ પ્યારાને પારણે સોનાનાં બોર. ♦
હૈયાને કાંઠડે આંસુનાં પૂર :
આંસુના પૂર, પરમ નયનાંનાં નૂર :
હૈયાને કાંઠડે આંસુનાં પૂર.—
માગ્યાં ન મુખે, નહીં નયને બોલાવ્યાં,
અણધાર્યાં આવી ઊભે હાજરહજૂર :
હૈયાને કાંઠડે આંસુનાં પૂર. ૧
વસતાં વેરાન જ્યાં રેતીનાં રણશાં,
એક જ કો સ્મરણે એ રેલતાં જરૂર :
હૈયાને કાંઠડે આંસુનાં પૂર. ૨
આભ જ્યાં તપે ને ભવ આખો તપાવે,
ઊછળી આવી તાપ કરતાં એ દૂર :
હૈયાને કાંઠડે આંસુનાં પૂર. ૩
ડુંગરના ભાર આવી અંતર દબાવે,
પાળોને તોડી ખાલી કરતાં એ ઉર :
હૈયાને કાંઠડે આંસુનાં પૂર. ૪
આનંદ કે શૉકનાં ફાટે સરોવરો,
કહેશો ન કોઈ ત્યારે, કરજો સબૂર :
હૈયાને કાંઠડે આંસુનાં પૂર. ૫
ઊડે જ્યાં તણખા ત્યાં ઊડે અમીકણો,
આંસુને ઝીલશે કો હૈયાનાં શૂર :
હૈયાને કાંઠડે આંસુનાં પૂર. ૬
આત્મા ભીંજાવજો એ પૂરમાં બહાદૂર હો !
પુણ્યોનાં પૂર, એ તો જન્મોનાં નૂર :
હૈયાને કાંઠડે આંસુનાં પૂર. ૭