રાસચંદ્રિકા/દૂધડાં દોહતી
| ← દાણ | રાસચંદ્રિકા દૂધડાં દોહતી અરદેશર ખબરદાર |
સવારમાં જળ ભરવા → |
કાંઈ ઊંચા તારા રણવાસ : |
દૂધડાં દોહતી
♦ રાતડલી રળિયામણી, મનમોહનજી. ♦
ગોરાં ઉજાસ, ગોરાં વ્યાણલાં, મનમોહનજી !
ગોરાં ગોરાં ગોકુલનાં ગામ :
દૂધડાં દોહું રે, મનમોહનજી !
ગોરી ચમેલી, ગોરી વાદળી, મનમોહનજી !
ગોરી ગોરી હું ને ત્હમે શ્યામ :
દૂધડાં દોહું રે, મનમોહનજી ! ૧
કાળી ભૃકુટી, કાળી આંખડી, મનમોહનજી !
કાલી કાલી ત્હમારી વાત :
દૂધડાં દોહું રે, મનમોહનજી !
આવી અડપલાં મા કરો, મનમોહનજી !
મ્હારા દૂધ દોહવણિયા હાથ :
દૂધડાં દોહું રે, મનમોહનજી ! ૨
કાળાં અખાડિયાં આભલાં, મનમોહનજી !
કાળા કાજળિયા અંધાર :
દૂધડાં દોહું રે, મનમોહનજી !
કાળી કાળી મ્હારી ગાવડી, મનમોહનજી !
ત્હેની ગોરી આ દૂધની ધાર :
દૂધડાં દોહું રે, મનમોહનજી ! ૩
કાળા ભ્રમર ભમે વાડીમાં, મનમોહનજી !
ગોરાં ગોરાં કમળના ફૂલ :
દૂધડાં દોહું રે, મનમોહનજી !
દિલે સિંહાસન દેવના, મનમોહનજી !
કરજો કાળાં ગોરાંનાં મૂલ :
દૂધડાં દોહું રે, મનમોહનજી ! ૪
કાળી કૂજે કહિં કોકિલા, મનમોહનજી !
ગોરા ગોરા આંબાના મ્હોર
દૂધડાં દોહું રે, મનમોહનજી !
આઘે વગાડો તમે વાંસળી, મનમોહનજી !
દો'તાં દહાડો જશે ચઢી પ્હોર :
દૂધડાં દોહું રે, મનમોહનજી ! ૫
કાળાં તળાવ, ગોરાં હંસલાં , મનમોહનજી !
ઊંડા ઊંડા જીવનના બોલ
દૂધડાં દોહું રે, મનમોહનજી !
લાવો, મટુકી તમ અત્માની, મનમોહનજી !
આ દૂધડાં સ્વાદ છે અમોલ !
દૂધડાં દોહું રે, મનમોહનજી ! ૬