રાસચંદ્રિકા/બહેનને આંગણે
| ← મારી બહેની | રાસચંદ્રિકા બહેનને આંગણે અરદેશર ખબરદાર |
ભાઇબીજ → |
બહેનને આંગણે
♦ સનખપુરા સાચી મા બહુચરા. ♦
આવો, વીરા આવોની મારે આંગણે !
વેરું સ્નેહનાં કુસુમ સારે આંગણે. ૧
વીરા, છાંટું સુધાનો છંટકાવ જો,
ભરું બારને પ્રભાતનો પ્રભાવ જો ! ૨
આજે માતજાયો આવે મારે ઝૂંપડે,
એની બહેનડીનું હૈયું વીલું શું પડે ! ૩
આજે હૈયાના મર્મ કંઈ ખોલશું ;
સુખદુઃખના બે બોલ કંઈ બોલશું. ૪
મારા વીરાનાં લેઉં સહુ દુઃખડાં,
થજો કાળાં પાપીનાં ભૂંડા મુખડાં ! ૫
ભૂંડું જગત કરે ને વદે વાકડું,
નડો તે ના વીરાનું ઉર રાંકડું ! ૬
મારા વીરાને તે નહીં સંતાપશે,
વીરા માટે બહેની આ પ્રાણ આપશે ! ૭
વીરા, બોલોની બોલ મધુમીઠડા !
હૈયાહર્ષ રહે ન અણદીઠડા. ૮
વીરા, વહાલે વધાવું હીરા રત્નથી;
એવો વીરો જડે ન લાખ યત્નથી ! ૯
'મારો વીરો' કહેતાં ભરાય મુખ જો !
વીરા, ધન્ય કહેવાડો માતકૂખ જો ! ૧૦
મારા તાતજાયા !કુળને દીપાવજો !
જગે કુંદનશું કીરતિ અંકાવજો ! ૧૧
મેઘ ગાજે ને ગરજે ગગનમાં,
એવા ગાજો, વીરા, આ ધરાજનમાં ! ૧૨
પિતૃવેલીને છાંય શીળી આપજો,
અમી સીંચીની તાપ સહુ કાપજો ! ૧૩
દીન બહેની અંતર સદા માગતી :
મારા વીરાની જ્યોત રહો જાગતી ! ૧૪
આવો, વીરા, આવોની વારી જાઉં જો !
મણિમુખડું દેખી હું મલકાઉં જો ! ૧૫
વીરા, આવો, વિરાજો મારે આંગણે !
ભર્યાં દીપે છે તેજ સારે આંગણે ! ૧૬