રાસચંદ્રિકા/રૂપેરી ચાંદની
| ← ચાંદની | રાસચંદ્રિકા રૂપેરી ચાંદની અરદેશર ખબરદાર |
પનિહારી ચંદા → |
રૂપેરી ચાંદની
♦ નીંદર ભરી રે ગુલાબે ભરી. ♦
ચલકી રહી રે હો ! ચલકી રહી,
આ રૂપેરી ચાંદની ચલકી રહી ! —
ફરતી આકાશે દેવસુંદરી કો ગોરી,
તેની આ પદરજ ઝલકી રહી :
આ રૂપેરી ચાંદની ચલકી રહી. ૧
દુનિયામાં દેવ કેરા આનંદ ઉતારવા,
રસની આ છોળ જાણે છલકી રહી :
આ રૂપેરી ચાંદની ચલકી રહી. ૨
રૂપેરી ફૂલપાન સાગર પર વેરતી,
ઘેલી આ પ્રેયસી કો પલકી રહી :
આ રૂપેરી ચાંદની ચલકી રહી. ૩
અધરાતી આંખોને એ અમૃતથી આંજવા,
લજજાળુ લલના શું લળકી રહી ?
આ રૂપેરી ચાંદની ચલકી રહી. ૪
હિમ જેવા શ્વેત નિજ હંસો ઉડાડતી,
મધુરાં હાસે કો આ મલકી રહી :
આ રૂપેરી ચાંદની ચલકી રહી. ૫
કોના આવાસમાં, કોના ઉરશ્વાસમાં,
સોહમની લહેર આ સળકી રહી.
આ રૂપેરી ચાંદની ચલકી રહી. ૬
અજબ બ્રહ્મમોરલાનું કિરણનૃત્ય દેખી,
આત્માની છેલ કોની ડળકી રહી ?
આ રૂપેરી ચાંદની ચલકી રહી. ૭