રાસચંદ્રિકા/વિસર્જન
| ← ભરતીનાં નીર | રાસચંદ્રિકા વિસર્જન અરદેશર ખબરદાર |
વિસર્જન
♦ પ્રેમની, પ્રેમની, પ્રેમની રે ♦
આવજો, આવજો, આવજો રે,
વહાલાં ! પાછાં વહેલેરાં આવજો !
લાવજો, લાવજો, લાવજો રે,
નવી રજનીના રાસ નવા લાવજો !—
ઝબકી ઝબકી પડ્યા ઝાંખા આ દીવડા :
માજીને દીવડે સમાવજો રે !
વહાલાં ! પાછાં વહેલેરાં આવજો ! ૧
માજીના રાસમાં ઝીલે છે સૃષ્ટિઓ :
ઝીલ્યો એ રસ તે ઝિલાવજો રે !
વહાલાં ! પાછાં વહેલેરાં આવજો ! ૨
વ્યોમે છે દીવડા, ભોમે છે દીવડા :
દીવડા હૈયે ઝબકાવજો રે !
વહાલાં ! પાછાં વહેલેરાં આવજો ! ૩
તાળીએ તાળી પુરાવી સૌ સાથે :
તાળીના બંધ બઢાવજો રે !
વહાલાં ! પાછાં વહેલેરાં આવજો ! ૪
નવનવ રાતની માણી મહેમાની :
જીવનભર જોખ એ ટકાવજો રે !
વહાલાં ! પાછાં વહેલેરાં આવજો ! ૫
આવો ને જાઓ છે જીવનના જોગ સૌ :
માજીનો રાસ જ ગજાવજો રે !
વહાલાં ! પાછાં વહેલેરાં આવજો ! ૬