વેણીનાં ફૂલ/વીરડો
| ← નીંદરભરી | વેણીનાં ફૂલ વીરડો ઝવેરચંદ મેઘાણી ૧૯૨૮ |
ચલ ગાગર → |
વીર મારે ગાળ્યા !
વીરડા રૂપાળા કેને કાજે ગાળ્યા?
બેનીને કાજ ગાળ્યા
પંખીને કાજ ગાળ્યા.
વીરડાનાં પાણી કેણીયે ઉલેચ્યાં ?
ભાભીએ ઉલેચ્યાં
કાકીએ ઉલેચ્યાં
મામીએ ઉલેચ્યાં.
વીરડાનાં પાણી કોણે ડોળ્યાં ?
દેડકે ડોળ્યાં
કાગડે ડોળ્યાં
વાંદરે ડોળ્યાં.
વીરડાનાં પાણી કોણ કરે આછાં ?
મોર કરે આછાં
મીન કરે આછાં
ચકી કરે આછાં
દેવ કરે આછાં.
વીરડાનાં પાણી આછર્યાં કેવાં ?
રાજાના હોજ જેવાં
તારાનાં તેજ જેવાં
પરીઓની પાંખ જેવાં
ઈશ્વરની આંખ જેવાં.
વીરડાનાં પાણી કોણ પીશે ?
ગાવડી પીશે
ઢેલડી પીશે
કોયલડી પીશે
વાદલડી પીશે
પદમણી પીશે.
વીરડાનાં પાણી કેમ કરી પીધાં ?
છાલીયે પીધાં
ટોયલે પીધાં
ખોબલે પીધાં
મોઢડે પીધાં
વળી વળી પીધાં
લળી લળી પીધાં !
વીરડાનાં પાણી મીઠડાં કેવાં ?
માતાના દૂધ જેવાં
વીરાના વ્હાલ જેવા
બાપુના બોલ જેવા
સહીયરના કોલ જેવા.
વીરડાની પોળે કોણ કોણ બોલે ?
મોર બોલે
સુડલા બોલે
ભમરલા બોલે.
વીરડાને કાંઠે કોણ કોણ બેઠું ?
બેડલું બેઠું
બટુકડું બેઠું
ઇંઢોણલી બેઠી
પારેવડું બેઠું
પોપટજી બેઠા
ગાવડલી બેઠી
ગોવાલણી બેઠી
માદેવજી બેઠા
પારવતીજી બેઠાં
સીતા ને રામ બેઠાં
રાધા ને શ્યામ બેઠાં !
વીરડાને કાંઠે કોણના વિસામા ?
ધોરીના વિસામા
પનીઆરીના વિસામા
મહીયારીના વિસામા
ભતવારીના વિસામા
દુઃખીયારીના વિસામા !