કલાપીનો કેકારવ/યજ્ઞમાં આમન્ત્રણ
| ← પ્રેમમાં ક્રૂર દોરો | કલાપીનો કેકારવ યજ્ઞમાં આમંત્રણ કલાપી |
રજાની માગણી → |
યજ્ઞમાં આમંત્રણ
અશ્રુની સૈયારી ધારાઃ
સૈયારી નિઃશ્વાસે જ્વાળા !
પ્રેમ સૈયારી પીડાઃ
આ છે ખાકે સૈયારી - વ્લાલાં સૈયારી !
સાથી ના મૂકીને જાશેઃ
સાથી સાથે રોશે, ગાશેઃ
દિલની ખાક દિલે ચોળશેઃ
ચોળો હર્ષે સૈયારી - વ્હાલાં સૈયારી !
શાનાં સૈયારી વિણ સુખડાં ?
સૈયારી ત્યાં શાનાં દુઃખડાં:
તોફાને હસવીશું મુખડાં:
લાવો નૌકા સૈયારી - વ્હાલાં સૈયારી !
સૈયારી સપનામાં આવ્યાં:
કફની આ ભગવી ત્યાં લાવ્યાં:
પ્હેરાવીને ને ના પ્હેરી કાં ?
આવો આવો, સૈયારી - વ્હાલાં સૈયારી !
વ્હાલાં! આપું જે પામ્યો તેઃ
વ્હાલાં! પામું જે આપ્યું છેઃ
સૈયારી જગવી'તી હોળીઃ
લેવી સૈયારી ઝોળી - વ્હાલાં સૈયારી !
૯-૧-૯૮