કિલ્લોલ/લાલપ ક્યાંથી!

વિકિસ્રોતમાંથી
કિલ્લોલ
લાલપ ક્યાંથી!
ઝવેરચંદ મેઘાણી
૧૯૨૯
પીપર લીલી →





લાલપ ક્યાંથી !


તારે આવડી લાલપ ક્યાંથી રે
મારા લાડકવાયા લાલ !

તારે આવડી કૂણપ ક્યાંથી રે
મારા લટકાળા હો લાલ !

તારી હાથ–હથેળી
પગની રે પેની
ગુલ-ફુલ સરીખા ગાલ;

એને આવડાં રંગ્યાં શાથી રે
મારા બોલકણા હો બાળ ! –તારે૦

માડી ! હું ને હરિ બે રમતા રે
એક મેઘ–ધનુષ મોઝાર;
અમે લથબથ કુસ્તી કરતા રે
ઘન ગાજતું ઘમ ! ઘમ ! કાર;

મારો પગ ગ્યો લપસી
પડ્યો ગગનથી
ઉતર્યો આંબા—ડાળ;

તું તો નીર–નીતરતી ન્હાતી રે
એક સરવરિયાની પાળ;
તું તો જળ–ઝીલણિયાં ગાતી રે
તારી ડોકે ફુલની માળ;

મને જુગતે લીધો ઝીલી રે
મારાં અંગ હતાં ગારાળ;
તારા અંતરમાં ઝબકોળી રે
મને નવરાવ્યો તતકાળ ;

તારા ઉરથી ઢળી ગઈ લાલી રે
મને રંગ્યો લાલમ લાલ;
તું તો બની ગઇ કાળી કાળી રે
મને કરિયો લાલ ગુલાલ !

તારે આવડી લાલપ ક્યાંથી રે
મારા લાડકવાયા લાલ !